Ինչպես գիտենք, այսօր առավոտյան 7:10-ից Ադրբեջանի զինված ուժերը սկսել են նախահարձակ ռազմական գործողություններ իրականացնել մեր Հայրենիքի սահմանների ուղղությամբ: Թշնամին իր նենգ մտադրությամբ թիրախավորում է Արցախի ու Հայաստանի խաղաղ բնակավայրերն ու բնակչությանը՝ դարձյալ խախտելով մեր ստեծարար ու շինարար ժողովրդի անդորրը, խաղաղությունն ու անվտանգությունը:
Մենք դատապարտում ենք Ադրբեջանի ահաբեկչական մտադրություններն ու գործողությունները և վերահաստատում, որ խաղաղությունը այլընտրանք չունի:
Փառք Աստծուն խաղաղություն հաստատող և մեր ազգի ու պետության գոյության իրավունքը պահող Հայոց բանակի համար: Փառք Աստծուն մեր զինված ուժերի ամեն զինվորի, սպայի և նրանց սրբազան, անձնազոհ ծառայության համար:
Իբրև քրիստոնյա, մենք գիտենք՝ ամեն ինչից առաջ Աստված է մեր ժողովրդի Տերը, պահապանը և ապավենը: Սաղմոսերգուն 27-րդ Սաղմոսի 3-րդ համարում ասում է․ «Եթե վրաս զորաբանակ էլ գա, սիրտս չի վախենա։ Եթե իմ դեմ պատերազմ էլ ծագի, սրանում ես վստահ կլինեմ»: Աստված իր ժողովրդին երբեք չի թողել, և դա մենք տեսել ու զգացել ենք մեր պատմության ամբողջ ընթացքում:
Եկե՛ք ազգովի աղոթք ու աղերսանք բարձրացնենք առ Աստված մեր ժողովրդի ապահովության, մեր երկրի ու սահմանների խաղաղության, անվտանգության ու կայունության, մեր բանակի համար։ Աղոթենք կորուստ ունեցող հայրենակիցների ընտանիքների մխիթարության համար: Աղոթք բարձրացնենք մեր միասնության, ոգու տոկունության և մեկ բռունցք լինելու համար:
Աստված պահապան մեր ժողովրդին ու մեր երկրին: