Ա Պետրոս 4.7-11 Շաբաթ | Նոյեմբերի 9
Յուրաքանչյուր ոք ինչ շնորհ ընդունել է, այն իրա՛ր մատակարարեք։ Ա Պետր. 4.10
ԾԱՌԱՅԵԼ ՍԻՐՈՎ
Քրիստի առաջին աշխատանքային օրն էր Վիրջինիայի սրճարանում, նա սպասարկում էր Իբբի անունով մի հաճախորդի: Քանի որ Իբբին խուլ էր, նա պատվիրեց՝ մուտքագրելով այն իր հեռախոսի ստեղնաշարի վրա։ Այն բանից հետո, երբ Քրիստն իմացավ, որ Իբբին սրճարանի մշտական հաճախորդներից է, որոշեց ավելի լավ ծառայել նրան՝ բավականաչափ սովորելով ամերիկյան ժեստերի լեզուն, որպեսզի Իբբին կարողանա պատվեր կատարել առանց այն գրելու:
Քրիստը փոքր առումներով ցույց տվեց Իբիին այն սերն ու ծառայության հոգին, որ Պետրոս առաքյալը քաջալերում է բոլորիս ցուցաբերել միմյանց հանդեպ: Քրիստոսի հետևորդներին ուղղված իր նամակում, ովքեր ցրված և աքսորված էին, առաքյալը նշում է, որ նրանք պետք է խորապես սիրեն միմյանց՝ ասելով. «Ամեն ինչից առաջ միմյանց նկատմամբ ջերմ սե՛ր ունեցեք» և հորդորում, որ օգտագործեն իրենց պարգևները մյուսներին ծառայելու համար (Ա Պետր. 4.8, 10): Բոլոր հմտություններն ու կարողությունները, որոնք Աստված տվել է մեզ, պարգևներ են, որոնք մենք կարող ենք օգտագործել ուրիշներին օգուտ բերելու համար: Դրանով մեր խոսքերն ու արարքները կարող են պատիվ բերել Աստծուն։
Պետրոսի խոսքերը հատկապես կարևոր էին նրանց համար, ում նա գրում էր, քանի որ նրանք ապրում էին ցավի և մեկուսացման շրջան: Նա կոչ արեց նրանց ծառայել միմյանց դժվարության ժամանակ, որպեսզի կարողանան դիմանալ փորձություններին: Թեև մենք չգիտենք, թե կոնկրետ ինչ ցավ է ապրում մեր կողքինը, Աստված կարող է օգնել մեզ ցուցաբերել կարեկցանք և ողորմություն ՝ ուրախությամբ ծառայելով միմյանց մեր խոսքերով, ռեսուրսներով և կարողություններով: Թող Աստված օգնի մեզ ծառայել ուրիշներին՝ արտացոլելով Իր սերը:
Ընդառաջ գնա՛նք Պետրոս կոչին՝ միմյանց անմնացորդ և անշահախնդիր սիրով ծառայելու:
Աղոթք – Հա՛յր, օգնի՛ր ծառայել շրջապատիս այն ամենով, ինչով օժտել ես ինձ: Ամեն։
Աստվածաշունչը մեկ տարում | Երեմիա 46-47, Եբրայեցիներին 6